Le poesie vincitrici del Concorso 2026

POESIA VINCITRICE – 1° classificata

(Schino Rita)

ADDÒ L ‘ACQUE SBATTE, U MÈURE RESPÓNNE 

Jéie o mére na’ nge vogghie ma me piésce add’ acchiemendaue spécialménde affaccète o meridde tra la Cattedrale e u tammúrre, quanne u saule préme de calè dréte all’ombra nére du Gargane, pére ca pigghie fûche; abbrazze le casere ca s‘affaccene e le ténge d’aure.

U tramonde da dè ogne volte jè nu spéttachele, ma na nè na vetréne de nu negozie, add’acchiemendaue ada scé che ci la bellézze na la vaite soltande che l’occhiere, ma anghe che l’aneme percè u tramonde jé nu sendeménde tra cile e mére.

Dè inde o spécchie de mére du porticciole le varchecédde nannechévene all’onda longhe du mére e le marenére s abbiévene a le guzze pe bardalle a le lambére; ma Nanucce na nge staive.

Nanucce u mére u tenaive inde a le vaine, pòie se ne scéje de chépe pe na spruscene du norde; la mamme u‘ avave puste da virte ma se sépe ca a cérte masque avaste nu péle de fémmene pe descanosce mamme e attène; véte tande ca na facéje a timbe add’ ascénne do ualtére ca che na mazzète de pennidde levè u naume de la mamme da saupe a la meréta drétte du gozze e mettè cudde de la megghiére.

La mamme pe na métte l’ammicce tra figghie e nore facéje accome a la Madonne ca cu mande arrevogghie tutte quande. Ma Emma, la megghiére ne tenaive de virme!

Fernéute le préme timbe de quanne n’ge schepettave la giacchétte n’nande a la porte préme ca assaive pe mére, acchemenzè add’appénne de musse ogne saire. U malechendénde acchemenzè a tezuè a la porte, la notte jnde o lite na trevave reggitte, préme de jédde u sapaive… pe Nanucce venaive u mére. Dréte a la ragge stè sémbre nu sendeménde e Nanucce u sapaive ca quanne u piaciaire se méseche o delaure accheménze la maledeziaune.

Foje na notte ca quanne Nanucce s’arrechié m’bonde a la varche pe mangiasse nu muzzeche de péne ca ammenè l’occhiere dell’alta vanne du mére, o cambanile de la cattedrale e o merlétte de lambadinne appeccète répa répa a la casere de péte ca abbrazzene u purte; nge paréje nu presépie asséute do lapese de Felippe Nisie.

La péte…la péte je chése, salvézze e sicurézze ma pe nu marenére cérte volte jé na galaire; quanne préme de la chépe je u core ca chemmanne e addò l’acque sbatte, u méure respònne….e respennè.

E accaume a le cavaddéune ca s’acchiatéscene quanne sbattene a le scuglie, adachesséche Nanucce atterè pe sémbre le réme saupe a la varche. Che n’alta mazzète de pennidde la facéje orfene de mére, de mamme e de megghiére; ma quanne u mére  u tine n’ gude te chiéme sémbre e t’aspette.

Nanucce se pegghiè’ na megghiére du norde, ma accome se fésce a spieghè u mére a ci na u téne? 

________________________________________________________________________________________________________________________

POESIA  – 2° classificata

(Marolla Nicola)

QUAND SBATT DE’ SOTT ALLA MADONN

(ANNETT E ROSETT)

CPUFFF… BUNFFTT… PTUNFFF…

Sò chiss I rmeur, m’bacc alla mraghija, d l’ond du mer l’acqu sbatt achsi’ fort, ca nan t per over.

Ma mentr saup, sccheuma bianch e cavaddeun sott chiu’ affun, ie’ calm, nan s mov nudd e nsceun.

Proprji dè’ avtav Annett, nu pulp femmn d scoglij saup all ciir do fil d btteun, p iedd ievn nu orgoglij.

a de’ s dcdè d scè ad acchiè Rosett, ca n’ge iav chggen

ca avtav tra TorrVntir e u macidd, all largh, ca s vlevn ben.

Avtav jind alla sabbij, iav mrtiscen, neangh a diir tnav na sola fil d btteun saup all ciir.

“Mo’ mnì” diss a I tre npeut moscardin, “acchmpagnatm veu p favor ca la ches d Rosett iè allnden, iè alla vì d for”.

“Uee cugina bella finalmend… iè almen nu uann ca nan vin a ches ce de ca teu iavt in centr, menz all scoglij, dè sott o paijes”.

“Eee.. cara Rosett, tra problem, la ches, I fighij e u maret nan tengh mangh u timb d’appen do algh all fnistr e d sistmè do pet” “Nè pi na segg, ce m raccund d sott alla Madonn, ce m desc?”.

stonn semb tanda gend? ca mò tra Picch tres u mais d Mesc”.

“Cerrò ti a desc Rosè, gend ca ven, gend ca vè, tanda frastir vonn tutt a Ciss “Lochel” p mangè pizz, panin e vevv birr e mir”.

“Ad Agust qulche jieun vè ad acchiè la Madonn alla Chisa grann ma la maggior part, p ristorand e pizzerì, ca iè lisc n’gann”

“Po stonn Chidd ca chiamn B&B, addo dormn e la maten fascn colazion nascn accaum all fungh, senza controll, iè chess la question”.

“E c PO’ t vu fè na cammnet jind o paijes e fe scè I pit gocc ce stè na panghin p d’assitt, nudd, a da rmanè all’mblt”

“M dciav la nonn e purangh mamm ca tant’ann fè quand sen e naun Stav na canden in Via cattedrale, se proprij dè ca I crstien ievn semplc e s vlevn tutt ben parind, vcen d ches, anzien e giuvn , s dvdevn I pen”

“L’addeur d I chcen economch, menz all vichl stritt

I mninn ca scquevn, facevn confusion ma ch rspett, citt citt”

“La devozion a Marì d Chrsegnen d I marner mamm, mgghijr e fighij, a prghè p l’umen lor ca stevn n’menz a mer”.

“Nanonn, angor chiù ndret, e I vicchij andech parlevn d mamm ca allattevn mninn d’altr mamm senza latt, mninn jind a la nech” “D guerr, d fem, d solidarietè, I crstien s’aitevn tra lor ci tnav na caus d chieuw da mangè, la donav cu cor”.

“L scevenazzis semb orgoglios e fiir, da Perseo all guerr mondial ma angh onest, altruist, agarbet e assè cordial”.

“E pò u dopoguerr in Italij e puranghe a Scevenazze ch I manch affrtequet, tutt a fadghè e a fass u mazz”.

“E iè a chedda generazion, ca bsogna acchiemendè, u dciav anch la nonn chedd d l’umn ch I calz e d I femmn ch la gonn”.

“Sò lor ca nann allasset n’eredtè importand

e iè grazij a lor ca benesser e Ibertè vonn angor nnand”.

“Mo l’alta dè so asseut, m so pust saup o scoglij, de d frond alla clonn so Vist tutt facc arragget, I prolem nan s’affrondn, c dè l’allas de s stonn”

“losce ogne ieun penz a se stess, arroganz e presunzion fascn dann la cattiverij e u malumor, crescn e s vetn, vonn agrenn ch la bann”

“Scevenazze iè accaum a na bella bombonir, ma I chmbitt jind hann scadeut e allor I scevnazzis hanna recuperè u bun du passet, hanna parlè nan sanna stè meut”

“Neu pulp d Scevenazze a ma fè nu “Sollecito”, vlem politch ca I giuvn armanen dò e naun ca hanna fè I valesc e all giuvn ngè penzem dop, ngè penzem PO”‘

“A ci vlem dè la colp? la colp iè d ogneieun e iè d tutt ma neuw a cuss paies ngè velem ben lo stess, sem pulp scvenazzis nan ngè petem fè nudd”

________________________________________________________________________________________________________________________

POESIA  – 3° classificata – Premio al merito Memoria e Identità di Giovinazzo

(Dangelico Rosa Maria)

NU VIÀGGE JÌNDE A LE RADÉSCE DE LA STORJE DE SCEVENÀZZE

Na bella déje de sàule, jìnde o pajése vècchje me ne sciajve cammenènne.

M’affermíbbe a la véje de la Madònne de l’Angiue, la stréte de quanne jajve menènne.

Nu bèllisseme fióre gialle, na vòcche de léone, assajve da mmènze a le péte de nu palàzze:

jèvene alméne trènde anne ca na ne vedajve a Scevenàzze.

Quanne, ó spendaune, assìsse a nu gradéne, la nonna máje vedíbbe.

U córe acchemenzé ad abbàtte fòrte; cherríbbe,

me l’abbrazzíbbe e, che le lacreme a l’occhjere, decíbbe:

“La nò, accómme ti acchje dó téue?

Nan penzajve ca t’aviva vedaje chjéue!”

E jèdde respenné: “Menò, víne che maje,

ca na càuse ti a fè vedaje”.

Pe la stratuècchje de San Gesèppe a cammenè accemenzèmme

e pó a senistre, da sòtte ó Cilze, aggerèmme.

N’affermèmme dananze a nu palàzze ca tenajve gròsse péte quadréte sàupe a la faccéte.

La nònne me facé traséje. Salèmme le schéle e stajve nu bèlle giardéne.

Dananze ó giardéne stajve nu pùzze de péte,

che trè facce a la víe de nnanze e niéune a la víe de dréte.

“La nò e chìsse facce de ci sò?”

“Chìsse sò le càpere de le Saracéne.”

“E percè stònne dó?”

“Stajve nu tímbe, chjéue de mille anne fè,

ca le chrestiéne a Scevenàzze tranguille nan petèvene stèje:

stajve u rìschje, in condinuazióne,

ca le Saracéne facèvene n’invasióne

e na manére besognajve trevèje

ca le Scevenazzíse s’avèvena salvèje.

E ogne stréte, ogne péte jajve na protézióne.

Víne che màje…”

E na stratuècchje strètta strètte, mènze a du méure de péte, me perté a vedàje:

“Véte chèssa stréte: ié acchesì strètte ca ce passe nu crestiéne ié péure assèje,

acchesèje pe le scevenazzíse iajve chiù facele scappèje

e se petèvene defènde quanne le Saracéne vedèvene arrevèje”

Pó la véje de Lècce begghièmme

e, a senìstre, da la véje de la Cattèdrale, aggerèmme.

Quanne passèmme vecéne ó Uàrche du Vínde,

m’arecherdíbbe de quanne, la demèneca maténe, de vírne,

che mamme e che sòreme, pe scéje a la Mèsse da ddè sciajve:

attùrne attùrne u addàure du ragù se sendajve,

nu vínde fòrte do mére venajve e dó uàrche passajve

e néue scèmme ascappéte… pu frìdde e percè la cambéne senajve.

Pó che la nònne arrevèmme a Chiazze Còstandenòpele

e m’affermíbbe ad acchiamendèje la stàtue de San Cristòfere.

Mèndre na museca dòlce de chitàrre assajve da jìnde a nu setténe,

m’arecherdíbbe quanne, menènne, attàneme m’acchembagné ddè vecéne,

percè jé aviva fèje nu desègne, pe la scóle, de chèssa granne e bèlla stàtue de péte:

da tanne m’a sèmbe affascenéte.

La nònne me decé: “U ssè ca péure chèssa stàtue de péte jajve na protèzióne?

Se deciajve na prèghíre e se sciajve in procèssióne,

acchesè San Cristòfere la staté ne proteggiajve da le tembèste d’acque e vínde…

… Parléme de tande anne fè: iajve u mille e settecínde.”

Che la nònne pó arrevèmme vecéne ó Tammùrre

e me facé vedàje la Meragghjie, ca jé gè la canesciajve bbúne:

“Véte figghja màje, chùsse méure de péte iajve la defésa chiù granne,

ma stajve nu alte sistéme, angóre chiù ‘mbortande.”

E cammenènne acchesé,

fíne sòtte ó púrte me perté.

“Le véte chìsse dó chelònne de péte?

Préme jèvene traje e u púrte de sàjre servèvene ad achjéute:

gròsse catàjne venèvene uséte

acchesséje de nòtte, quanne l’attacche de le Saracéne facèvene chiù paghéure,

u púrte núste e u pajése stèvene o sechéure”.

Achjedíbbe l’occhjere e me ‘mmageníbbe la scéne: ó tramònde tande úmene fúrte,

ne pìcche ‘ndèrre e ne pìcche sàupe a le varchecídde, achjedèvene u púrte.

De le marenére sendajve la vàusce

e de chìdde catàjne sendajve u remàure.

Pó la nònne me decé: “Cússe púrte, ca mó acchesséje tranguille e cìtte cìtte u véte,

de cùsse pajése l’àneme a stéte.

Varche, peccinònne e granne, scèvene e venèvene, careche de pìsce, iúgghje, legnéme,

ma péure càreche de stúrje de marenére, vecéne e lendéne.

E quanne na tembèste arrevajve,

la cambéne de la Cattèdrale, u Bombàun, fòrte senajve.

E accóme l’ònde du mére sbattèvene,

acchesséje le fèmmene s’agetèvene

e, affaccéte a la Meragghje, la Madònne de Chersegnéne preghèvene,

aspettènne ca marètere e fìgghje reternèvene.”

La nònne s’affermè, u sguarde séue cangè

e che na vàuscia dòlce me decé:

“Cùsse púrte a stéte péure la chésa màje pe tande anne…

… Acchiamínde da chèdda vanne.”

M’aggeríbbe e vedíbbe na scéne ca mè jìnde a la véta maje l’avajve vìste:

na decéne de fèmmene, fìgghje e megghjíre de marenére, nzìste nzìste,

stèvene a sparnezzéje e ad arepezzèje

le ràite ca servèvene pe peschèje.

Le movemínde de le mméne acchesséje prècíse e véloce jèvene

e attùrne a lóre stajve na mòreue de criatéure ca sceqquèvene.

Sendajve le véusce de le fèmmene ca canzóne andéche candèvene

e le stúrje de le patemínde amére de le marenére racchendèvene.

E chìdde véusce lendéne

se mescechèvene che chèdde de nu gaggéne

ca vuajve sàupe a nu mére d’aure e d’argínde…

… me rescaldajve u sàule e m’accarezzajve u vínde.

La cambéne de la Cattèdrale sené

la mènzadéje.

Apríbbe l’occhjere, m’aggeríbbe e la nònne na ‘nge stajve chjéue:

avajve stéte assoltande nu súnne méje.

________________________________________________________________________________________________________________________

PREMI SPECIALI:

PREMIO ORIGINALITA’ assegnato a Depalma Umberto

COLIN E NINETTE

Colin sbatte u pulp de prema maten dret a purt.

U cazz che tutte le zirr.

Nge fesce assé tutte u amaure da inze alle cirr.

A ogne colpe, dall’aneme nu sespere

Ca indo core respere

E nge fesce desce:

Ninetta mai, vugghieme bene ancore,

cud vese ca me si dete,

 drete o traiene de mest Frangische

abbasce a Meschen,

ié nu mpegne d’amore overe.

 Inze all’aneme ha remese

E na iesse chieù. 

Po’ cus mais de mesce

Chiù forte ancore fesce assé la vausce.

Ninetta mai vineme a trevè

Mò moi, accame stè a stè.

Iè, stritte stritte

Accamme a cus pulp

Abbrazzete a taie voghie stè.

Teu la chepe , iè le cirr e

Ce cademe inze all’acque du mere

Ai fete alle tre chelun

Neu na peteme mè scè a funn,

nemmene che la tramenden.

Ninetta mai, u ammore nust avà iesse

chiù forte de le cavaddeun!

________________________________________________________________________________________________________________________

PREMIO MUSICALITA’ assegnato a Demartino Giuseppina

U PAIÉSE MÉJE, TRA RECURDE, MÈRE E PETE

Jéune de le ferteune du paiése méje,

ié tenaie u mere ca ne fesce chembagnè.

Sembe presende, da tutte na vete,

a mmaje me piesce quanne iè agétete.

Accamme a josce cu maistrele,

ca scioche che jidde ca ascenne e sele.

Ah…ci è belle, nan avastene le parole,

ce u mère cande, u vinde sone.

S’abbrazze a le scoglie, le velesse pertè allendene,

poje se ne vè e allasse la sckéume.

M’arrivene ‘mbacce stizze salete,

achiugghjie l’occhjere, trattenge u fiete,

e mendre repigghieche a resperè, m’arreve nu recurde de tand’anne fè:

u mère aggetete e néue, spendatidde,

abbrazzete drete a le scoglie pe reparanne do vinde.

Nu amore innocende, senza pretese,

jave dolce u sapore de le preme vése.

Che l’occhiere ‘ngandete de du meninne,

la vedeute de rimbette ne paraive na cartollinne.

Che cusse recurde de na giovendù passete,

veleme cammenè pe le stesse strete.

Accamme a tanne so tutte de chianghe,

u saule appicce le pete bianghe.

E mendre cammeneme pu paiése vecchjie,

vedeme nu crestiene jinze a na stretuecchjie.

Me pere strene, u sacce,mò nan jè na nevetè,

attocche le meure, nge stè a parlè?!?

La curiosetè jeve la megghje,

ialzeche u passe e appezzesceche le recchie.

Parle asseule, nan me so sbagliete,

pere ca aspette na resposte da chidde pete.

Me so avvecenete ne picche assè, velisse scè ‘ndrete,

s’aggere tutte na volte, forse ha scecandete.

Pere aggetete, ialze le vrazze,

s’ammaine ‘ngudde e m’abbrazze.

Ne picca fastediete pe tanda chembedenze,

fazze pe scimminne senza dange adenze.

Ma mendre m’aggireche, m’auande na mène,

arreve mariteme…se chiamene: “cheggene”.

Ne sceme ad assete a nu sedire de pete,

ne racconde le fatte da quanne ha parteute.

Spiegaisce ca la corde nan s’ha mé spezzete

che cusse paièse tra mère e pete.

E u recurde chiù forte? U chiù ‘mbortande?:

le raite scettete pe na peschete  abbondande.

Pe tutte la notte, da penende a levande,

pe poje attralle ‘mmenze vacande.

‘Nzime o u’ atténe, notte e deje pe mère,

saupe a chedda varche se sendaive nu marenere.

E cudde pe jidde iave nu sunne:

comandande de la marine, aggerenne tutte u munne.

Ma u sunne fernesce, le solte so picche,

nan avastene chieu a sfamè la famigghie.

Pe chesse parterene pe terre allendene,

sperenne de feje tanda ferteune.

Ma la ferteune a volte iè cechete,

tande ié overe ca nescieune de lore fine a mò ha ternete.

Ma u paiése, u mère e le pete nan s’hanne mé stanghete

De fange sembe la stessa chiamete,

e poje, de ternè, ou attene ‘ngi u avaive premisse,

e doppe tande anne finalmende ha seccisse…

‘Mberatande u cile s’ha colorete de russe, u saule ha calete,

la vedeute pere nu quadre,…te leve u fiete.

Se specchiaisce jinze all’acque la chiisa granne,

u mère cande na ninna nanne.

Jinze o purte le varche navechescene,

sponde la leune, l’onde luccechescene.

U paiése se stenne saupe a le scoglie, pigghe u sunne tranguille,

pe nan nge fè pegghjiè fridde, u arrevogghie nu mande de stille,

e quanne cré iesse u saule, accamme a la Venere de Botticell,

pere ca anghe teu, nasce da jinze a mère, oh paiése méje belle!

________________________________________________________________________________________________________________________

Ed ecco tutti gli altri componimenti

ADDÒ L ‘ACQUE SBATTE, U MÈURE RESPÓNNE (Bavaro Florinda)

Iè na demèneche matiene d’Aguste, oere de messe, stogghje a scè a la chiese ‘ a granne a preghè la Madonne de Chersegnene.

Se sènde nu addòere pe la strète. “Mamme máje, cerrò stonne a checenè?”

“Ehhh, ma cusse addòere arrève proprje d’abbasce o’ setténe de Méline”.

“Buongio’ Méline e buene demèneche. Ciait si preparéte iosce?”

“E nudde, so viste la belle scerennéte e m’ha venéute vogghje de na belle frettèure de mére”. “ Meh, buene appetite!”

Mbratande, vésceche da lendéne Mariètte, ca stè a spanne le rrobbe deffoere o’ setténe séue. “Che cappre si puste, Mariètte? Si ‘mbregnéte tutte la strète!”

“Le so lavéte a méne, cu sapaune de Marsiglie, proprje accaume se faciajve na volte”. “Statte buene, Mariètte”

Sotte o’ Cils u’ sòele iè adacchessè forte ca s’attacche a le chianghe. Penzeche a quanne, la déje de la Madonne, le portatoeure s’abbascène pe falle passè. U’ seddòere, le cande, u’ calle, le chiande de le devote… Iè belle assè.

Me séndeche chiamè da dréte: iè Cicce, nu chembagne méje. Me vole fè vedà na cause. Vogghje ‘nzìeme a iidde sotte u’ tammurre. Cinquandanne e fésce u’ pescataure; ava allasséte nu poste fisse a la Fincantieri da quanne s’avà accattéte na varche de 5 metre. Iidde veláive la libèrtè.

Me fésce vedà le pulpe c’ha pegghjéte, quatte pulpe belle grusse, 3 o 4 kg l’éune. E accaume ha scéute u’ fatte? Iidde stajve a pulpescè e nu caggéne s’ ava appeggiéte saupe a la varche.‘Nge ‘a pertéte fertéune.

A le mégghje de tutte, ca Cicce stajve che la chèpe abbascéte, u’ caggéne, bum bum, s’ ha mangéte chidde alte du stafféile ca ‘nge avivene remaste!

“Mannagghje! E mó, accaume ia fè a pulpescè?”, ‘nge decé Cicce.

‘Nzòmme, chidde e  du stafféile u’ hanne aiutéte a fè assè la scerennéte.

“Viète a ci se l’avà mangè chidde pulpe, iè ovére, Cicce? Meh, statte buene”

Ne picche chiéu ‘nnanze nan vogghje ad acchjè Geséppe, u’ férroviere?

Avà ascennéute da Verone, percè iè u’ combleianne de la mamme, ca tutte canòscene coème la zì Marie. Nan petaive ammanghè. So trend’anne ca Geséppe stè lendéne da Scevenazze, ma nudde ha cangéte: avaste ca iidde achjéute l’occhjére e sende l’addoere de l’èrve du mére, u’ víende de scerocche ca ‘nge vè ‘mbacce, accaume a na carìzze de mamme. Pe nan parlè de le cheloere: u’ saule, le lèusce de le lambère, le gréite de le marnére. ‘Nge ascenne na lagreme. ‘U abbrazzeche. “Gesé, u’ tiembe passe ma arrecurdéte sembe ca Scevenazze nan passe mè inde o’ coere téue! Te vogghje béne!”

“Meh, véue veleite sapaie accaume ha scéute a fernésce chedde mateine?”

A la chiese nan so scéute chiéue ma me so anghiéute l’occhjére de cheloeure, de rrobbe da mangè, de pulpe grusse, sotte a le piéte le chianghe. Belle, belle. Chesse iè Scevenazze, la mia Giovinazzo: l’acque du mére, u’ víende, le pète bianghe… nu paiese addò l’acque sbatte e u’ méure respònne sembe.

“Addoialte vu scè?” “A nescièune vanne!”

 

ADDÒ L ‘ACQUE SBATTE, U MÈURE RESPÓNNE (Caccavo Letizia)

Se sendaive da quanne ièmme criatèure,

scènne scènne jinde o paièse vecchie mènze à le mèure.

Chidde timbe paraive ca nan avèvena speccè mè

Pe quande ièvene belle, senza penzire ma lendène assè.

Tanne nudde sapèmme de la uèrre, le sellète

E ciait Scevenazze avive stète,

ma mènze a chidde mèure

ne sendème e ne sendèmme sechèure.

So accome à le nonne: picche picche parlèvene,

ma accome aviva fernèsce, gè u sapèvene.

Po staive jidde: u mère.

Iaive belle assè quanne m’avava letré

E fridde quanne m’avava ammené.

Le cavaddèune nièune drète ò ualte arrevèvene,

azzeppèvene mbacce alle scuglie e nan ze lamendèvene.

Iè invèce spisse e volèndire me lamendàive:

e mò faciaive calle e mò le sèle jinde à l’occhiere sciaive,

le scenocchiere schercète ca l’acque m’abbresciaive,

u gelète ca se squagghiaive.

E le mèure signe e condrasigne vedèvene

E tutte cause citte citte sendèvene.

A mangè che la famigghie mbacce a mère iaive belle,

neue scèmme tutte à la cappèlle.

Dè subete avèmme arrevé,

ce se naune u poste nan z’acchiaive e la greggellè iaive assè.

Le mammere noste che le tjidde chiène mènze à le pète cammenèvene

E l’attanere na chèdde de streminde pertèvene:

sigge, mbrille, borse, sciuche, mannèle…

Ca paraive manghe ca qualche nieune de chèse l’avive caccète.

Tanne u tèlèfene, le playlist e tutte chisse fessarè nan ne tenèmme

Che la museche du chiosche ca vennave le gelète n’acchendandèmme.

La menzadè tutte sotte à l’ombrellone ne schaffèmme

E cu callaure le lasagne de la zie ne mangèmme.

Pèure ca dave ne picche de credazze

Ne mangèmme chedde e nu stuzze de fecazze.

Pe fè u bagne avèmme aspettè tre iaure,

ma doppe cing menèute ù mère gè ne paraive d’aure.

Jidde ne chiamaive e neue respennèmme

E tutte le meninne n’ammenèmme.

Ogne tande acchiamèndeche angore dè

Le pète s’anne chenzemète…e pure iè.

L’acque chendinue a sbatte e ù mèure a respònne.

E mènze à lore vèsceche arrète chedda criatèure ca iaive,

ca tutte penzaive e nudde sapaive.

U mère mè m’ha fatte paghèure

Forse percè drète a mà staive sembe cudde mèure,

u mèure de Scevenazze ca m’abbrazzaive

e la bellèzze ca m’accarezzaive. 

 

NU’ AMÔR DESPERÉTE  ‘MBÀCCE A MÉRE (Massari Myriam)

Pére nu’ spècchje u’ mér

lisce comm’ a’ l’ugghje, adavér

e jinz’ ô’ purt ‘na varchecédde

tutta coloréte e bèdde

ô’ Tammùrre fésce l’ucchje.

e dachesè l’iniziativa pigghje..

Ma cudd sté ddé indifferènt

e  manc’  l’ acchiamènd.

N’onde se despiésce de chèssa noncurànz

e s’alz, s’abbàsce, fésce  remèure in abbondànz

pe ddè ‘na schetuéte ô torròn senz’amor e tust

ca sté ferme ddè  e pe nudd s’à must.

Péure u’ vind s’arràgge pe’ sta’ freddèzze,

s’agetésce e all’ond ‘nge dè chieù grandèzze

La spènge, la sbatte violènte

sàup ô tammùr e a la muraglia innocènte

“E jè ce c’entre jnz à le fatt vust?

Stogghje ddò percè ddò m’hann pust”

déisce chiangènn pe’ le scàffe la muràglia

“Avéite scatenét ‘na battaglia”

Allor la varchecèdda sbattéute e sofferènte

addemànna o’ vind de fermàsse prontamènte

percè  quann u’ amôr nan jè correspùst

 nan se fésce la uèrre, nan è giust.

Se calme u’ vind e l’onda s’abbàsce

 e finalmente la quiéte renàsce

Sàup o’  tammùrr se jàpre ‘na fenèstre

vecéin  a dò à nét  ‘nu ciuff de ginèstre

Péere  qués  ca’ u’ torriòne fésce l’ucchje

E allor la varchecèdde respèire megghje…

capisce u’ messàgge

e se prepàre tranquilla ô viàgge

 Eh…ava jésse  amôr a distanza

 ma jinz ô côr nan stè lontanànze!

 

ÀIE E U MÉRE (Papagna Isabella)

Da peccenònne scéieve cammenènne che papà, tenèieve la ménì de re scàrpe ròsse traforàte e chémmené me facéieve bùene.

Sò stàte sémbre zeppetédde da quénne sò néte, avetémme ind’alla térre,  veciàiene o Terriòene Pàssere.

È nè méravìggheie sendàie u mére, de vìerne è nè mésciàiene preccé l’ònde ca sbàttene còndre ‘o Méuere te fàscene stà énziàuese, d’éstàte nvèce te dònne allegràeie, vòggheie de scettàsse ind’all’acqu’a salàte ca s’appìzzeche ngùedde.

Sò néte ind’all’a prim’a deciàiene du méiese de lùgleie, sòele e stìdde nzìeme è la méggheie acchecchiàte pe godésse u addòere du mére, spèceie de prìm’a métàiene o dòpe la condròere, pe nén pegghiàsse nu còlpe de sòele.

La mézzadàie pe méieche nèn éiere còese, nèn méngiéieve cì nèn vedéieve u mére, almèiene da nu retràtte ci stémme ngàse o ci chievéieve fòrte assé.

Appène néte mémmé e atténeme me prettévene mbàcc’e mére a véieve u bibbì, mè aìe vevéieve assòele quénne ammenéieve u mére e ci nèn u faciàieve chiéngèieve fòrte e nèn ne veléieve sapè de vèieve.

Chiù u mére éiere nzalvaggiàte e chiù aìe éiere chendènde assè, méndre ci stàve quiéiete aìe me mettéieve pagàuere e pe pegghià u sùenne nge veléieve u passéggìne ngàse preccé nèn ne velàieve sapé de dremmèie.

Ci me mettévene ind’o lìette nèn éiere còese, gredéieve tòtte lé nòtte, stàve vìspe còme a né zémbéne, pàuere ci mémme me stàve sémbre appìrse; nèn zeppertéieve u lìette; cérte vòlte venévene a càse parìnde e veciàiene a vedé, preccè nèn nge credévene ca ind’o lìette èiere la chiù nzalvaggiàte du paiàiese.

Tutte chésse fìne alle tré énne. Me chiémévene la menénne ca chéndàève de nòtte. Nèn stàve mè sénz’a scàrpe, me le levévene assòléménde ci me l’abbràzzèieve sòtt’o chesciàiene, pe méieche éiere come ci me levévene la bambòlìne chiù càre ca tenèieve.

Pò, né béll’a dàie avìbbe né sorprése dall’azzeiéne mè dall’a vènne de papà: né bececlétte Belinda ca éiere né méravìggheie, vérde sméràlde.

Pu prìesce fòrte me mbarìbbe sùbete sùbete e dòpe la condròere ne scémme che  re bececlìtte aìe e papà, ìdde nnénze e aìe dréiete. Ne sciémme pe re stràde du paiàiese e pe chére de foere, aìe acchiemendéieve tùtte, l’arve chiàiene de frutte e l’érve o chéndòene de la vàie, ci cherréieve e ci scèieve chiéne, l’énziéne ca scecquévene a re càrte e le menìnne ca trennéieve dalla scòele.

Tùtte quénde acchiemendévene la menénne ca chiéne chiéne che la bececlétt’e nòeve sciàieve dréiete o attène ca ind’alla réccheie le deciéieve de nèn affremmèsse ci u mére veléieve vedè!

Quénne acchessì aìe sendéieve allòere chiù fòrte pedaléieve fin’a quènde u mére nèn vedéieve e quénne u acchemenzéieve a vedé, tùtte céléste cìele e mére, u còere m’acchemenzéieve a bàtte fòrte.

Me piacéieve tùtte du mére: le mérnére ca vennévene le pìsce de la scrennéte, chìre ca peschèvene che la lénze e aspettévene cìtte cìtte àuene grùesse e nvéce pò s’acchendéndéieve de nu pesciudde.

Tùtte aìe acchiemendéieve, nghéndàte do mére ca sémbre sciéieve nnènze e dréiete sènz’affremmésse mè, ca chéngiéieve chelòere ed éiere vàieve de gréngete e patélle sòepe alle scùeggheie. Né dàie m’avvecenibbe, me levibbe le scàrpe e l’allassìbbe sòepe o scùeggheie chiù grùesse che l’érv’e mbòsse sòepe; mettìbbe le pìete ind’all’acque e l’acchemmenzìbbe a sendàie sòepe all’a pélle e ìnde de mèieche. Dòpe fù tùtte nu sciùchele, che l’acque e sénze, fìn’a quénde me rendìbbe cùnde ca le scàrpe appìrs’e méieche nèn nge stàvene chiàue, u mère se l’avéieve pegghiàte. Chér’a dàie me mbarìbbe ca u mére te dé sì félicità mé pàuere delòere, ca te dé mé pàuere te pòete levà.

Pedènne ca chér’a dàie papà ogné vòlte ca scémme o mére pe prìm’e còese me faciàieve attaccà le scàrpe all’a bececlétte preccè nén le petémme pérde arréiete; le sòlte ind’a càse nèn érene assé e chìre pìcche ca tenémme érene mbùsse de sedòere come deciàieve atténeme.

Mére… mére te sò velùte béiene da peccenònne e te vòggheie béiene éngòere mò  preccé quénde l’ònde sbàttene còndre ‘o Méuere m’allàssene arrecùrde còme pennellàte sòepe all’a tèiele de la vìt’e mè.

 

U LAZZE O CORE (Raguseo Elisabetta)

Ste nu lazze o core ca me se spezze

tra mamma terre quande figghie e nu scevenazzaise quande nasce,

quande l’ acque a le scuglie sbatte

e u preme chiande du criateure annunge u fatte.

E accame nu figghie pote aggere’ u munne ma preme o doppe alla mamme retorne

acchese’ u core du scevenazzaise all’ acque ca sbatte responne.

Ci vene do paiese vecchie soprattutte se porte inze

u callaure de le meure tutte atturne alla Meragghie e de le chianghe

addo’ batte u saule la state’, de le pete bianghe

inde all’ occhiere scene de pescateure che le gattudde appirse

ca retornene saupe a la vie de la Chisa Granne o saupe o Cilse,

u addaure du pesce, de le sarde e de le remasugghie

e cudde de le matarazze anghieute de pagghie,

u addaure du panettudde fatte a chese e de le panne

e pe le strateddere u prefeume de le pietanze pertete o furne sotte u Arche de Sand’Anne.

E la demeneche specialmende

da prema matene u arome du ragù c’attaccarezze u nese

e te fece sendeie de schiame’ u stomeche e la vende.

Cusse paiese vecchie ca sepe de mere e de Maestrele

se porte drete u addaure de le settene

stritte e iumede, troppe vecene, ma senza invidie e gelosie

s’addevendaive na granne famigghie e così sie.

Fore da cusse munne ngandete tande cose petevene seccete:

ci capetaive de sendeie na trombe alle du

saupe o trerrote arrevaive Colin Lidu’,

u cappidde nghepe e la maglie leggere a righe bianghe e nere,

nan s’avaive me spesete e tenaive le baffe ascheure.

E oltre alla granite ca vennaive a 500 lire

tenaive peure u gelete bune a non finire.

So arecurde de fateche e veta vere

de ci ie attachete asse’ a chessa terre e a cusse mere,

de ci cudde lazze o core nau ha me spezzete

e quande poté a Scevenazze retorne arrete.

 

U CÈNDRO STORECHE… TUTTE N’ALDA STORIE (Rutigliano Giuseppe)

Ce te fé na cammenéte inde o paiès vécchie pére a vedà ca ù timbe sa v’affermét e vine spedèute a nù munne ca nane èsiste chiéue.

Quanne passe sotte o Arche Traiane, t’allasse ‘ndrète ù caséine odièrne e trése inde a nu munne ca na tène nudde a cè fé che le stengenatéure de iosce. La chiazza de Chestandenopele, timbe addréte iaive ù cèndre commèrciale dù paiéise. Scarvettésceche mménze alle recurde e pèscheche nu retratte ‘ngialléite ca ne racconde n’alda storie: La gheregelléie de le cherestiéne, accamme alle vìrme, che la faccia scavète dalla mesèrie. Sèndeche ù rusciuaminde de chisse ùmmene ca s’ammandéne a mènza d’azze accamme alla nègghie, mèndre la statue de sanda Mechéle ‘nege scétte n’ùcchie de reguarde. Accamme se faciaive alla reschéure, le zappatéure se radenèvene de mménze ca praticamènde iaive l’ùfficie du lavore pe la manodopere a quatte solte; le chereiatèure cherrévene e sceqquévene a maninedocche. Pènzeche a quanne picche abbesegnaive a chidde meninne pe sbambé u timb; miche accamme a iosce.

Sotte o arche du vinde na bèlla feleppéine me ùaste le capidde, po nnande a ma, accamme a na menacce, s’nnalze u cambanèile de la cattédrale che la faccéte romaneche-puglièse, mebastaredéte da ialte cevelté.

Iaive uagnengidde, faciaive l’èlèmèndare e mebaraive le préme poèsie a mémorie.

Lèoparde iaive cudde ca so sendéute chiù vecéine a ma. Sapét pecché? Pecché l’ottimisme, ié e idde, nu mangéme che le péne.

Sté na candenéte vecène alla cattédrale ca ogni volte ca passeche da dé nnande, père a veda ca me reporte a chidde lughe ca Lèoparde a dèscritte acchessi bélle inde a na poèsia saue. La corte du palazze ducale.

Quanne traseche inde a cudde chertéile, père manghe ca stogghe mménze alla chiazzètte du Sabete du Villagge.

Che ne picche de fandasie vèsceche la donzèllétte ca vène da fore che na verazzéta d’èrve sotte o verazze e mméne nu mazzetidde de marghèrite ca sa va piazzé ‘mbitte e ‘nghépe, cheré ca ié féste. Assisse saupe a l gradéne de cudde setténe, vèsceche la vecchiarèdde ca sté a flé, e ciacianne che le vecéine, narraisce il suo buon tempo,

Quande anghe ièdde, mazzuèdde e bérafatte, se preparaive la dé de féste.

L’arie se fésce aschéure e la lèusce argendéte de la lèune fésce merésce saupe alle péte de chidde casere. Sèndeche il lieto romore de le cheriatéure ca zombene o céndre de la chiazze. Ù zappataure ca se retéire stanghe e soddisfatte e pénze all’indomane ca sa v’arrepesé.

Po quanne tutt’atturne sa stetéte l’ultema lèusce, sèndeche batte ù martidde, la sérre du falegnéme ca ’mbatuaisce, achiéuse inde alla petté cu luminne appeccéte: e s’affretta e s’adopra di fornir l’opra préme ca sponde ù saule.

Quanne trése inde o arche de cusse palazze, pére ca ù timbe na téne timbe.

Cèrte quanne camèine inde o paièse vècchie, te sinde acchepéte. L’indemeté da chidde vanne te la petive senné, pecché le sepazie ièvene tutte in gomune, e le casere acchessé vecéine ca l’attucche soltande ce allarghe le verazzere. Le vèusce de chidde ca avetèvene se mescechèvene, e tutte sapévene de tutte.

Inde a chidde viozze la lèusce du saule na chéte mé derettamènde da ‘negile, ma arréive dope ca rembalze mo saupe a na loggie, mo saupe alle renzule bianche ca matraine dirimbétte a puste a sciarescé o maèstréle e po chèdda lèusce ca a viaggéte pe cissèpe quanda chelometre, finalmende se pose stanche saupe alle chianghéte allescéte da cendenèra d’anne de passe. Ù profume de la checéne ca le fémmene stonne a preparé ié nu bèlle misceca misceche de addéure; sinde l’aseprigna fragranza d’àghie sefritte ca iésse da la fenestrodde de nu setténe, ù addaure de le féfe cotte ca arréive sice da daue; ù fìte du pésce a ciambotte quèse quèse acchemmogghie ù addaure du ragù ca la vacanedéia granne du prème piéne a puste a cosce quanne ù saule setave angore aschennéute sotte alla linie de l’orizzonde.

Mménz a chéssa bennanze se sènde comungue la tambe de l’umedeté ca sa ‘nzacchéte mménze alle chiaminde de le pète, e la vendèta d’aria salemastre du mére ca sté dé, da ‘negualché vanne, derète a chidde casere.

Mèndre camineche, le pedéte s sènedene liteche liteche; sèndeche la frestaré de piatte e sartascene, u scareche du césse e l’acque ca scorre inde alle tube de la fegnatéure.

Sèndeche ù resciuizze de la tèlevisione appeccéte, sèndeche anezemèie, ‘negualchè déune sté a fé iarte e mestire… a chèss’aure po, e anghe ce na u véte, sinde la vausce du mére ca rombe ‘mebacce alle secuglie, come ce fosse na ziconedèlle ca se repéte sice da quande.

Ié facele ca te pirde mménze a chisse setratuècchie. Pinze ca na ferenèscene mé e passe e repasse e na te rinde cunde ca si gié passéte cissépe quand’alte volte.

Po trèse inde a nu vicolètte ca a malapéne arreisce a passé e t’ammanghe u respéire e all’imebrovvise da l’alta vanne se iapre nu sorte de largaune.

Finalmènde pinze ca si asséute do labirinde e si scambète pe n’ogne alla criatéure mitologeche ca Ré Minosse ‘nghiedéie inde o labirinde de la cevelté minoiche de Chenosse  e ca Dèdele chestruéie.

Isse saupe alla chiazze che le tritone ca scecutene iacque. La frescechéure de le pète ié soltande nu recurde, pecché mo la lèusce ca se reflétte sope alle chianghe bianghe, t’abbréusce l’occhire. Che na violenza bèllisseme te ‘negande ad acchiamendéie ù azzurre semeseréte du mére.

Mo si capéte ca la paghèure du labirinde servaive sole a pereparatte alla bellézze de cusse sepèttachele.

Finalmènde si capéte ca la magie la tenème nu stésse arreqquéte da ‘mgualchè vanne: amme attraverséte chidde vichele, acchiamendénne a do mettémme le pite pe na ‘nedreppequèie inde o passate per poi obbligarti a guardare l’infinito del mare e ritrovare finalmente te stesso.

Wagnengidde scherzèuse, chéssa giovinèzze ié accamme a na dé de féste… Chésse ié na bèlla staggione. Na te vogghie désce nudd’alte ma la fésta taie anghe ce taredaisce  a venéie, na te si ‘negarecanne.

E ié mo so capéte quale iaive la staggione ca deciaive Lèoparde. E ‘nanze alla bellézze de cusse mére e a chédde du timbe e de l’anne ca anne passéte, finalmènde ié me so retrevéte.

 

JÉJE M’ARRECÒRDE (Soranna Leonardo)

Jéje m’arrecòrde ca, quanne assìbbe d’o’ Spìzzje, scìbbe ad avetè che mammà o’ Pajése vècchje, a la strète du Spìrete Sante, ‘mbònda ‘mbonde

a la vèje de Pavone Grìffe. Stè na schèle che na chède de gradènere,

ca spìcce che nu tèrrazzéne, nu ballatòje.

 Jèmme na bèlla chemenetè de crestjène. Apprìsse a néue avetàjve la nonònne de na chembàgna màje de scòle, Marì Carevùtte , na vècchjarèdde vèramènde aggarbète, e n’àlt’e dò famìgghje ; dirimbètte stave Rafajèle Senagghjére.

 La sàjre, doppe la fatéche de la scernète, n’affermèmme a ciacè, a désce ngòlche fattarìdde c’avàve seccìsse,pe sbambè u’ tìmbe e pe fè amecìzzje. Jèmme affiatète e pe nùdde ammedjéuse jéune de l’alte: Forse jàive l’arje du Pajése vècchje. Comùngue, ogne jéune se faciàjve le fatte séue e l’alte se facèvene le fatte de tutte !

Mammà jàive dèvote a la Madonne de la Gràzzie, percè ngòlche vòlte avàjve stète acchentendète, e quanne La velàve preghè sciàjve da la vècchiarèdde ca avetàve de fronde a la Chjìse de San Lorènze, percè tenàjve la chjèje du pertàune de la chjìse.

A màje me piaciàjve a scè aggerènne p’u’ Pajèse vècchje percè nan àjve assèje la frestaréje accàume a mo’. Stèvene na chède de càsere abbandenète: jèvene sèmbe de cchjéue le crestjène ca se ne scèvene.

Ecche percè se sendàve, pe le stratuècchje e le vèche, u’ addàure de la checène ma péure la pùzze allassète da le vastèse.

Me piaciàjve naturalmènde acchjamendè u’ mère. Me dàve na cèrta tranquelletè quanne jàive calme e tranquìlle, pèròo…, quanne s’arraggiàve, me mettàve ‘ngùdde na paghéure! M’arrecòrde ca jàive acchessèje viòlende ca l’acque trasàve jìnde a le settène du’ lungomàare e le famìgghje nan avévene abbesùggne de scéje ad accattè u’ pèsce, s’u’ trevèvene derèttamende jìnde o’ piàtte la mènzadéje!

La sàjre, quanne jàjve tranguille, le marenère scèvene a peschè e

se vedèvene tande léusce jìnze a mmère, varche e varceddùzze che le lambère, percè jajve aschéure; le pèschèrègge, che ngòlche varche attacchète, scèvene a la lendène, addò jàive affùnne e le pìsce jèvene de cchjìue.

Vecène a la rève le marenère scèvene “a ffùche”, a càcce de pùlpe: S’avvecenèvene o’ scoglie e che la léuce  sàupe a nu bidòne puste jìnze all’acque scecandèvene u’ pulpe e u’arrenzèvene .

La demèneca matène le marenère na scèvene (e nan vònne) a peschè,

le vedìve, perciò, ad aggestè la rèzze ciacènne ciacènne.

M’arrecòrde ca u’ pèsce se vennàve a la Vèje de la Marène e quanne fernàve la vènnete remanàve nu fìite ca te n’avìva scappè.

Ame remèse bunarìdde a chèda chèse Doppe ‘ngolche jànne péure néue n’ame scèute, a la véje de Vetònde, pèrò quanne me so’ spesète,

le fotograféje cchjù bbèlle hànne stète chìde ca so fatte o’ Pajèse vècchje.

E so stète fòrse u’ préme, mo’ jève quèse cenquand’anne fè, a fàmme le fotografèje de matremònje sàupe a le gradènere de la chèse d’u’ Vjète Nicolò, vecène o’ pùzze du’ Saracéne, quanne jàive bèlle u’ giàrdéne, e sàupe a le schèle du rrè Fèrrande, o’ Vèche de l’aquele

Percè le so fatte dè? Percè jèje m’arrecòrde e na me so scherdète du Pajése vècchje.